सव्वभासाणुगाए य भासाए सव्वसंसए।
जुगवं सव्वजीवाणं छिंदिउं भिंतगोयरे॥
Name: Vīrajiṇathaya (Skt: Vīrajinastava)
Author: Abhayadevasūri
Original publisher: Sārābhaī Maṇilāla Navāba, Ahmedabad (1932)
Original Publication Name: Jaina Stotra Sandoha - Prathama Bhāga
Original Editor: Caturavijaya
Digitised by: Vyom A. Shah
Language of eulogy: Prākṛta
Metres used:
Skip to read original text only
ja:ijjā samaṇō bhayavaṁ mahāvīrē jiṇuttamē.
lōganāthē sayaṁbuddhē lōgaṁtiavibōhiē..1..
vaccharaṁ diṇṇadāṇōhē saṁpūriyajaṇāsaē.
nāṇattayasamāuttē puttē siddhattharāiṇō..2..
ciccā rajjaṁ ca riṭṭhaṁ ca puraṁ aṁtēuraṁ tahā.
nikkhamittā agārāō pavva:iē aṇagāriyaṁ..3..
parīsahāṇa nō bhīē bhairavāṇa khamākhamē.
paṁcahā samiē guttē baṁbhayārī akiṁcaṇē..4..
nimmamē nirahaṁkārē akōhē māṇavajjiē.
amāē lōbhanimmukkō pasaṁtē chinnabaṁdhaṇē..5..
pukkharaṁ va alēvē a saṁkhō iva niraṁjaṇē.
jīvē vā appaḍigghāē gayaṇaṁ va nirāsaē..6..
vāēvā apaḍibaddhē kummō vā gutta:iṁdiē.
vippamukkō vihaṁguvva khaggisiṁgavva ēgagē..7..
bhāraṁḍē vā’pamattē ya vasahēvā jāyathāmaē.
kuṁjarō iva sōṁḍīrē siṁhō vā duddhassiē..8..
sāgarō iva gaṁbhīrē caṁdō vā sōmalēsaē.
sūrō vā dittatēullē hēmaṁ vā jāyarūē..9..
savvaṁsahē dharitti vva sāyariṁdu vva sacchahē.
suṭṭhu huāhuāsavva jalamāṇē ya tēyasā..10..
vāsī caṁdaṇakappē ya samāṇē lēṭṭhukaṁcaṇē.
samē pūyāvamāṇēsu samē mukkhē bhavē tahā..11..
nāṇēṇaṁ daṁsaṇēṇaṁ ca carittēṇamaṇuttarē.
ālaēṇaṁ vihārēṇaṁ bhaddavēṇajjavēṇa ya..12..
lāghavēṇaṁ ca khaṁtīē guttīmuttī aṇuttarē.
saṁjamēṇa tavēṇaṁ ca saṁvarēṇamaṇuttarē..13..
aṇēgaguṇamayāiṇṇē dhammasukkāṇa jhāyaē.
khāikkhaēṇa saṁjāē anaṁtavarakēvalī..14..
vīyarāē ya niggaṁthē savvannū savvadaṁsaṇē.
dēviṁdadāṇaviṁdēhiṁ nivvattiyamahāmahē..15..
savvabhāsāṇugāē ya bhāsāē savvasaṁsaē.
jugavaṁ savvajīvāṇaṁ chiṁdiuṁ bhiṁtagōyarē..16..
hiē suhē a nissēsakāraē pāvvapāṇiṇaṁ.
mahavvayāṇi paṁcēva paṇṇavittā sabhāvaṇē..17..
saṁsārasāyarē buḍḍujaṁtusaṁtāṇatāraē.
jāṇavva dēsiyaṁ titthaṁ saṁpattē paṁcamiṁ ga:iṁ..18..
sēsivēāyalē miccē aruyē ayarāmarē.
kammappavaṁcanimmukkē jaē vīrē jaē jiṇē..19..
sē jiṇē vaddhamāṇē a mahāvīrē mahāyasē.
asaṁkhadukkhakhiṇṇāṇaṁ amhāṇaṁ dēu nivvuiṁ..20..
ia paramapamōā saṁthuō vīranāhō
paramapasamadāṇā dēu tullattaṇaṁ mē.
asamasuhaduhēsuṁ saggasiddhībhavēsuṁ
kaṇayakayavarēsuṁ sattumittēsu vā vi..21..
payaḍīva sa:i pahāṇaṁ sīsēhiṁ jiṇēsarāṇa sugurūṇaṁ.
vīrajiṇathayaṁ ēvaṁ paḍha:u kathaṁ abhayasūrihiṁ..22..
जइज्जा समणो भयवं महावीरे जिणुत्तमे।
लोगनाथे सयंबुद्धे लोगंतिअविबोहिए॥१॥
वच्छरं दिण्णदाणोहे संपूरियजणासए।
नाणत्तयसमाउत्ते पुत्ते सिद्धत्थराइणो॥२॥
चिच्चा रज्जं च रिट्ठं च पुरं अंतेउरं तहा।
निक्खमित्ता अगाराओ पव्वइए अणगारियं॥३॥
परीसहाण नो भीए भैरवाण खमाखमे।
पंचहा समिए गुत्ते बंभयारी अकिंचणे॥४॥
निम्ममे निरहंकारे अकोहे माणवज्जिए।
अमाए लोभनिम्मुक्को पसंते छिन्नबंधणे॥५॥
पुक्खरं व अलेवे अ संखो इव निरंजणे।
जीवे वा अप्पडिग्घाए गयणं व निरासए॥६॥
वाएवा अपडिबद्धे कुम्मो वा गुत्तइंदिए।
विप्पमुक्को विहंगुव्व खग्गिसिंगव्व एगगे॥७॥
भारंडे वाऽपमत्ते य वसहेवा जायथामए।
कुंजरो इव सोंडीरे सिंहो वा दुद्धस्सिए॥८॥
सागरो इव गंभीरे चंदो वा सोमलेसए।
सूरो वा दित्ततेउल्ले हेमं वा जायरूए॥९॥
सव्वंसहे धरित्ति व्व सायरिंदु व्व सच्छहे।
सुट्ठु हुआहुआसव्व जलमाणे य तेयसा॥१०॥
वासी चंदणकप्पे य समाणे लेट्ठुकंचणे।
समे पूयावमाणेसु समे मुक्खे भवे तहा॥११॥
नाणेणं दंसणेणं च चरित्तेणमणुत्तरे।
आलएणं विहारेणं भद्दवेणज्जवेण य॥१२॥
लाघवेणं च खंतीए गुत्तीमुत्ती अणुत्तरे।
संजमेण तवेणं च संवरेणमणुत्तरे॥१३॥
अणेगगुणमयाइण्णे धम्मसुक्काण झायए।
खाइक्खएण संजाए अनंतवरकेवली॥१४॥
वीयराए य निग्गंथे सव्वन्नू सव्वदंसणे।
देविंददाणविंदेहिं निव्वत्तियमहामहे॥१५॥
सव्वभासाणुगाए य भासाए सव्वसंसए।
जुगवं सव्वजीवाणं छिंदिउं भिंतगोयरे॥१६॥
हिए सुहे अ निस्सेसकारए पाव्वपाणिणं।
महव्वयाणि पंचेव पण्णवित्ता सभावणे॥१७॥
संसारसायरे बुड्डुजंतुसंताणतारए।
जाणव्व देसियं तित्थं संपत्ते पंचमिं गइं॥१८॥
सेसिवेआयले मिच्चे अरुये अयरामरे।
कम्मप्पवंचनिम्मुक्के जए वीरे जए जिणे॥१९॥
से जिणे वद्धमाणे अ महावीरे महायसे।
असंखदुक्खखिण्णाणं अम्हाणं देउ निव्वुइं॥२०॥
इअ परमपमोआ संथुओ वीरनाहो
परमपसमदाणा देउ तुल्लत्तणं मे।
असमसुहदुहेसुं सग्गसिद्धीभवेसुं
कणयकयवरेसुं सत्तुमित्तेसु वा वि॥२१॥
पयडीव सइ पहाणं सीसेहिं जिणेसराण सुगुरूणं।
वीरजिणथयं एवं पढउ कथं अभयसूरिहिं॥२२॥